انداز مرا حسنِ بیاں تک نہیں پہنچا
جو رنگِ سخن خوب ہو واں تک نہیں پہنچا

پہنچے ہیں بہت لوگ ستاروں سے پرے بھی
کوئی بھی مرے دردِ نہاں تک نہیں پہنچا

مفلس یہ خبر سن کے ہی بس ڈوب گیا ہے
سیلاب ابھی اُس کے مکاں تک نہیں پہنچا

اعزاز ہے یہ حضرتِ شبیرؓ کو حاصل
سر ایسے کوئی نوکِ سناں تک نہیں پہنچا

جو زخم دیے تو نے مرے دل میں نہاں ہیں
یہ ذکر کبھی میری زباں تک نہیں پہنچا

فیضان ہے مجھ پر یہ مرے گنجِ شکرؒ کا
غم کوئی مرے دل، مری جاں تک نہیں پہنچا

محسوس میں کرتا ہوں محبت میں گرانی
یہ بار ابھی بارِ گراں تک نہیں پہنچا

سمجھا نہ کسی نے بھی مرے درد کو تائبؔ
کوئی بھی مری آہ و فغاں تک نہیں پہنچا