جھکے گا غیر کے در پر تو مار ڈالے گا
مجھے پھر ایسے مرا سر تو مار ڈالے گا

میں ہوں فقیر میں رکھتا ہوں خیر ساتھ اپنے
رہے گا ساتھ مرے شر تو مار ڈالے گا

زلیخا یوسفِ کنعان سے یہ کہنے لگی
تمھارا حسنِ ستم گر تو مار ڈالے گا

مجھے وہ کافی ہے جو کہ مرا مقدر ہے
کسی کا چھینا مقدر تو مار ڈالے گا

ڈرایئے نہ ہمیں حشر کے عذابوں سے
کہ جیتے جی یہ ہمیں ڈر تو مار ڈالے گا

نہیں میں طالبِ دنیا ہوں طالبِ مولا
قسم خدا کی مجھے زر تو مار ڈالے گا

تمھارے اشک نہ تائبؔ تھمے تو دنیا کو
یہ آنسوئوں کا سمندر تو مار ڈالے گا