وہاں دشمن بھی ہوتے ہیں جہاں پر یار ہوتے ہیں
جہاں پہ پھول ہوتے ہیں ، وہیں پر خار ہوتے ہیں

پتہ اُن کا اگر چاہو مرے ہر زخم سے پوچھو
جدھر سے تیر آتا ہے وہیں سرکار ہوتے ہیں

مقدر میں جو سختی ہو تو ایسا ہو ہی جاتا ہے
وہی گھر لوٹ لیتے ہیں جو پہریدار ہوتے ہیں

میں افشا راز کر سکتا ہوں تیری بزم کے ظالم
کہ میں سب جانتا ہوں جو بھی کاروبار ہوتے ہیں

جہاں والوں کے دل میں ہم نے تائبؔ جی یہ دیکھا ہے
انھیں کی یاد ہوتی ہے جو باکردار ہوتے ہیں