کوئی طبیب ہی ایسا نہ چارہ گر کوئی
کرے ہمارا مداوائے چشمِ تر کوئی

مرے وجود سے اُٹھنے لگی ہیں خوشبوئیں
کہ ایسے مجھ میں سمایا ہے عشوہ گر کوئی

میں اُس کو حالِ دلِ زار کیسے بتلاتا
مجھے ہوا نہ میسر پیام بر کوئی

مرے حضور یہ زندہ دلوں کی بستی ہے
نہ بے ضمیر یہاں پر نہ کم نظر کوئی

امیر شہر! یہ حالت تری رعایا کی
ہے پا برہنہ کوئی اور برہنہ سر کوئی

خدا کے واسطے ناصح ہمیں اجازت دے
کہ انتظار میں اپنے ہے بام پر کوئی

ہے میرے حال سے دنیا تو باخبر تائبؔ
ہے میرے حال سے کیوں اتنا بے خبر کوئی