ہو ملاقات جو اپنوں سے یا اغیار کے ساتھ
کتنا اچھا ہو اگر سب سے ملیں پیار کے ساتھ

تو نے منصور بڑی دار کو عزت بخشی
ذکر ہوتا ہے تو ہوتا ہے ترا دار کے ساتھ

میں تو بس دُور ہی رہتا ہوں ہمیشہ ان سے
میری بنتی جو نہیں زر سے نہ زردار کے ساتھ

آسرا حشر میں آقا کی شفاعت ہو گی
کون واں ہو گا بھلا مجھ سے خطاکار کے ساتھ

مجھ کو منظور فقط تیری رفاقت جو ملے
نہ رہے کوئی تعلق مرا سنسار کے ساتھ

ساتھ تیرے بھی وہی ہو گا یقینا تائبؔ
جو کہ ہوتا ہے یہاں ایک وفادار کے ساتھ