ہم سے درویش کوئی مال نہ زر رکھتے ہیں
کوئی دیوار نہ در اور نہ گھر رکھتے ہیں

یہ بھی سچ ہے کہ نہ ہم بال، نہ پر رکھتے ہیں
جاری ہم پھر بھی وفائوں کا سفر رکھتے ہیں

رکھتے بے تاب ہیں دل، آنکھ کو تر رکھتے ہیں
مرے حالات مجھے زیر و زبر رکھتے ہیں

چاکِ دامان لیے خاک بسر رہتے ہیں
تیرے دیوانے کہاں اپنی خبر رکھتے ہیں

اُن کے تُو میرے خدا! خیر سے سینے بھر دے
میرے احباب کہ جو سینوں میں شر رکھتے ہیں

روٹھنے والے بھلا بیٹھے ہیں تائب ؔہم کو
روٹھنے والوں کو ہم یاد مگر رکھتے ہیں