جس شخص کے لہجے میں ہی تاثیر نہیں ہے
کر سکتا کسی دل کو وہ تسخیر نہیں ہے

کیوں آس مری ایک بھی پوری نہیں ہوتی
کیوں میرے کسی خواب کی تعبیر نہیں ہے

اجمال سے اشکوں نے بیاں کر تو دیا ہے
کامل یہ مرے حال کی تصویر نہیں ہے

اب جائو مسیحا کو مرے ڈھونڈ کے لائو
اب اور مرے بچنے کی تدبیر نہیں ہے

جکڑا ہے زمانے کی رسومات نے ہم کو
ٹوٹے گی کبھی ایسی یہ زنجیر نہیں ہے

دکھ درد ہیں تائبؔ مرا سرمایۂ ہستی
ان جیسی کوئی دوسری جاگیر نہیں ہے