مزاجِ وقت دیکھو وقت کی رفتار تو دیکھو
لکھا ہے کیا سرِ دیوار تم دیوار تو دیکھو

مقدر میں یہی لکھا تھا یہ بھی ٹھیک ہے لیکن
سبب کچھ اور بھی ہو گا تم اپنی ہار تو دیکھو

اے حاکم تجھ پہ لازم ہے نگہ بانی رعایا کی
کہ اس کی مفلسی اور اس کا حالِ زار تو دیکھو

نہیں تیار خلقت کیوں تمھاری بات سننے کو
خدا کے واسطے اس خلق کا انکار تو دیکھو

اگر وہ باوفا ہوتا ، کبھی ایسا نہیں کرتا
صفِ دشمن میں جا بیٹھا ہے میرا یار تو دیکھو

خدا کا شکر کرتا ہے ادا دردِ محبت پر
ہُوا ہے محوِ سجدہ عشق کا بیمار تو دیکھو

تمھارا نام جپتا ہے فقط تائبؔ تمھارا ہے
تم اس کی چاہ تو دیکھو، تم اس کا پیار تو دیکھو