دکھ درد کے مارے ہوئے انسان کی صورت
بیٹھا ہوں درِ یار پہ دربان کی صورت

افسوس کہ اس بات کو ہم بھول چکے ہیں
کس دنیا میں ہم آئے ہیں مہمان کی صورت

مجھ پر جو تری ایک عنایت کی نظرِ ہو
بن جائے گی یہ درد کے درمان کی صورت

صورت کی تری روز میں کرتا ہوں تلاوت
صورت ہے تری آیتِ قرآن کی صورت

صورت وہ نظر آئے تو چمکے یہ مقدر
ہو تشنہ نگاہوں کے بھی درمان کی صورت

کیوں شہر مجھے لگتا ہے ویران ہی سارا
کیوں گھر بھی مجھے لگتا ہے زندان کی صورت

ہونٹوں پہ مرے ذکر نبیؐ جاری ہے تائبؔ
صد رشک ملک ہے مرے ایمان کی صورت