پہنچ نہ پائے گا منزل پہ کارواں میرا
کہ راہ بر جو ہے سردارِ رہزناں میرا

حیات و موت میں اک قدرِ مشترک ہے یہ
کہ ذکر ہوتا ہے بس ان کے درمیاں میرا

اگرچہ تیز سہی آندھیاں انائوں کی
بچا ہوا ہے ابھی تک تو آشیاں میرا

میں اُس کے ظلم اسی خوف سے ہی سہتا ہوں
کہ ہو نہ جائے کہیں یار بدگماں میرا

اُٹھا نہ پائیں گے یہ بوجھ بے وفائی کا
نحیف جسم مرا ، قلبِ ناتواں میرا

رہی ہیں ٹوٹ جو مجھ پر قیامتیں پیہم
مرے خدا کو ہے مطلوب امتحاں میرا

اجاڑ دوں گا اُسے جو اسے اُجاڑے گا
عزیز جان سے مجھ کو ہے گلستاں میرا

کسی کے درد سے تائبؔ قرار ہستی میں
کسی کی یاد سے بستا ہے یہ جہاں میرا