وہ کم کم یاد رکھتا ہے زیادہ بھول جاتا ہے
ہمیشہ کر کے وعدہ اپنا وعدہ بھول جاتا ہے

ارادہ کر تو لیتا ہے وہ میرا ساتھ دینے کا
مگر اکثر یہ ہوتا ہے ارادہ بھول جاتا ہے

بھلا دیتے ہیں ایسے شخص کو سب خانداں والے
جو اپنی اصل ، اپنا خانوادہ بھول جاتا ہے

کشادہ گھر بنا لیتا ہے جو زردار ہوتا ہے
مگر رکھنا وہ اپنا دل کشادہ بھول جاتا ہے

اگر چالاک ہوتا یاد رکھتا تہمتیں سب کی
یقیں مانو کہ تائبؔ ہے جو سادہ بھول جاتا ہے