یہ ہم نے غور کرنا ہے یہ ہم نے سوچنا بھی ہے
جو ہم نے آج بونا ہے اُسے کل کاٹنا بھی ہے

فقیری کے ضوابط میں میاں اک ضابطہ ہے یہ
کہ زندہ دل کو رکھنا خواہشوں کو مارنا بھی ہے

مجھے یہ خوف بھی لاحق کہیں رسوا نہ ہو جائوں
کہ میں نے اُس سے اُس کا ہاتھ آخر مانگنا بھی ہے

یہ چھت اپنی، در و دیوار اپنے ، گھر ہے یہ اپنا
کڑا جو وقت آئے جاں کو اس پر وارنا بھی ہے

یقیں مانو بڑی مشکل میں ہے پھر آج کل تائب ؔ
وہ ظالم اب یہ کہتا ہے کہ اُس کو بھولنا بھی ہے