اماں ملی نہ، ترستے رہے اماں کے لیے
تو زہر پی لیا تسکینِ جسم و جاں کے لیے

ہے میرے سر کو فقط تیرے نقشِ پا کی طلب
مری جبیں ہے ترے سنگِ آستاں کے لیے

خدا کرے کہ یہ ان آندھیوں سے بچ جائے
کہ تنکا تنکا جو رکھا ہے آشیاں کے لیے

نگاہِ بد سے بچے حسن کا وہ صدقہ دے
یہ مشورہ ہے مرا میرے مہرباں کے لیے

وہ ایک ایک مسافر نگاہ میں رکھے
بہت ضروری ہے یہ میرِ کارواں کے لیے

غم حیات کا سورج ہے سر پہ تو کیا غم
کسی کی یاد ہی کافی ہے سائباں کے لیے

چمن کو چھوڑ کے جانے لگے ہیں تائبؔ جی
قسم خدا کی یہ مژدہ ہے باغباں کے لیے