آسانی و سکون ، فراوانی ٹال کر
رہتا ہوں خوش میں خود کو مشقت میں ڈال کر

آنسو جو میرے آپ کے دامن پہ گر پڑے
ان موتیوں کو رکھنا مری جاں سنبھال کر

غم یہ کہ ہم کو دنیا نے تقسیم کر دیا
تو دل کے ٹوٹنے کا نہ اتنا ملال کر

میں نے پھر اُن کو مانگ لیا تھا جواب میں
جب مہربان ہو کے وہ بولے سوال کر

آ جائوں گا میں بزم میں تیری مگر ہے شرط
میری نشست پہلو میں اپنے بحال کر

سچ ہے اگر یہ بات تو پھر حوصلے سے سن
چہرے کو سُرخ اور نہ آنکھوں کو لال کر

تائبؔ فراق و ہجر کی تلخی کو جھیل جا
اے باکمال ایسا بھی کوئی کمال کر