ایمان سے وہ شخص تو ایماں کی طرح ہے
وہ دشمن جاں مجھ کو مری جاں کی طرح ہے

ہر دن ہے تری صورتِ پُرنور کی صورت
ہر رات تری زلفِ پریشاں کی طرح ہے

عزت میں بہت کرتا ہوں ہر ایک ہی ماں کی
ہر ماں مجھے لگتا ہے مری ماں کی طرح ہے

اک تیری جھلک باعثِ تسکینِ دل و جاں
دیدار ترا درد کے درماں کی طرح ہے

ساون کی طرح میری ہے آنکھوں کا برسنا
اور جلنا مرے دل کا، چراغاں کی طرح ہے

ہر شب ہے مری رنج کی روداد کے جیسی
ہر روز مرا درد کے عنواں کی طرح ہے

جس دن سے مرے دیس کو تم چھوڑ گئے ہو
اُس دن سے مرا دیس بیاباں کی طرح ہے

دستورِ زباں بندی یہاں جب سے ہے نافذ
یہ شہر مرا شہرِ خموشاں کی طرح ہے

ہے وصل ترا گلشن و گلزار کی مانند
اور ہجر ترا خارِ مغیلاں کی طرح ہے

اے قیس! ترا چاکِ گریبان جو دیکھا
یہ چاک مرے چاکِ گریباں کی طرح ہے

ہر صبح، مری صبحِ قفس جیسی ہے تائبؔ
ہر شام مری شامِ غریباں کی طرح ہے