ورفعنا کی صدا
محمد اویس ازہر مدنی
عشقِ احمدؐ کی ضیا ہے ورفعنا کی صدا
دلِ عرفاں کی صدا ہے ورفعنا کی صدا
قدسیوں کی بھی ندا ہے ورفعنا کی صدا
سرورِ دیںؐ کی ثنا ہے ورفعنا کی صدا
کس کو معلوم ہوئی رفعتِ سرکارِ جناںؐ
کون جانے گا کہ کیا ہے ورفعنا کی صدا
پڑھ کے ملتا ہے سکونِ دل و جاں قاری کو
قلبِ عاشق کی نوا ہے ورفعنا کی صدا
مدحتِ سرورِ عالمؐ ہے ہر اک پر لازم
اک فریضے کی ادا ہے ورفعنا کی صدا
جاں گزیں کرتی ہے دل میں شہِ دیںؐ کی الفت
مرے آقاؐ کی ولا ہے ورفعنا کی صدا
خود سے اک لفظ بھی لکھا نہیں جا سکتا تھا
مرے مولیٰ کی عطا ہے ورفعنا کی صدا
بخش دیتی ہے تر و تازگی ایمان کو بھی
خلد کی آب و ہوا ہے ورفعنا کی صدا
ہے یہ گنجینئہ عشقِ شہِ والاؐ ازہر
بالیقیں دولتِ ما ہے ورفعنا کی صدا