تضمین بر مشہورِ زمانہ نعت بہ قلمِ حضرت حفیظ تائب
’’خوشبو ہے دوعالم میں تری اے گلِ چیدہ‘‘
خاموش سخنور ہیں، دہن ور ہیں دریدہ
شایانِ نبیؐ ہو ہی نہیںہو سکتا قصیدہ

کم تابِ سخن اور فزوں ذوقِ شنیدہ
خوشبو ہے دو عالم میں تری اے گُلِ چیدہ
کس منہ سے بیاں ہو ترے اوصافِ حمیدہ
اللہ کی مومن کے لئے ذات ہے سچّی
دن حشر کا سچ ، قبر کی ہر رات ہے سچی

قرآن کی ہر حجّتِ آیات ہے سچی
اے ہادیِ برحق تری ہر بات ہے سچی
دیدہ سے بھی بڑھ کر ہے ترے لب سے شنیدہ
جب آنکھ ہوئی نم ،تری یادوں کی بدولت
ہوتے ہیں غلط غم، تری یادوں کی بدولت

فرحت کا بہا یم ،تری یادوں کی بدولت
اے رحمتِ عاؐلم !تری یادوں کی بدولت
کس درجہ سکوں میں ہے مرا قلبِ تپیدہ
پیغام کوئی ایسا نہ لائے گا جہاں میں
یوں اہلِ نظر کو نہیں بھائے گا جہاں میں

رتبہ کوئی تجھ جیسا نہ پائے گا جہاں میں
تجھ سا کوئی آیا ہے نہ آئے گا جہاں میں
دیتا ہے گواہی یہی عالم کا جریدہ
اشکوں کے گہر چشمِ تمنّا میں سجا کر
اے رحمتِ کونینؐ! کرم بہرِ خدا کر

سرکارؐ کے دربار میں رو رو کے صدا کر
خیرات مجھے اپنی محبت کی عطا کر
آیا ہوں ترے در پہ بہ دامانِ دریدہ