ﷺ
فرمانِ کبریا ہے اُنؐ پر درود پڑھنا
اے مومنو! نبیؐ پر اکثر درود پڑھنا

قندیلِ دل میں شمعِ اُلفت کرے فروزاں
حبِّ رسولؐ کا ہے مظہر درود پڑھنا

شمس الضحیٰؐ کے پیارو! بدرالدجیٰؐ پہ تارو!
دن بھر درود پڑھنا! شب بھر درود پڑھنا!

شانِ نبیؐ خدا نے خود ہی بلند کی ہے
اپنے سکونِ دل کی خاطر درود پڑھنا

لاریب مغفرت کا بن جائے گا وسیلہ
محفل میں سب کا مل کر اُنؐ پر درود پڑھنا

جب بھی دعا کی خاطر دستِ دعا اُٹھاؤ
اوّل درود پڑھنا ، آخر درود پڑھنا

ثابت حدیث سے ہے کوئی بھی حد نہیں ہے
عرفانؔ! تم کبھی نہ گن کر درود پڑھنا