ﷺ
گوشِ عالم میں پڑی ہے وَرَفَعنا کی صدا
ہر زمانے نے سنی ہے وَرَفَعنا کی صدا

گلشنِ جاں میں رچی ہے ’’لَکَ ذِکرَک‘‘ کی مہک
دل کی دھڑکن میں بسی ہے وَرَفَعنا کی صدا

مالکِ خیر نے کی خیر کی کثرت اُنؐ پر
اہلِ شر سے نہ دبی ہے وَرَفَعنا کی صدا

عقل والوں نے جسے ذکرِ خدا سمجھا ہے
عشق والوں میں وہی ہے وَرَفَعنا کی صدا

مدحتِ شاہِ اُممؐ زینتِ قرطاس و قلم
صوت کا حسن بنی ہے وَرَفَعنا کی صدا

سننے والوں نے سنی آیۂ نَشرَح لیکن
لبِ قاری پہ سجی ہے وَرَفَعنا کی صدا

اس پہ قرآن کی آیات ہیں شاہد عرفاںؔ
ربِّ کونین نے دی ہے وَرَفَعنا کی صدا