ﷺ
کس زباں سے ہم بتائیں ہم کو کیا اُنؐ سے ملا
منزلِ عرفانِ حق کا راستا اُنؐ سے ملا

نوریوں پہ نورِ صبحِ کُن فکاںؐ کی بارشیں
پیکرِ خاکی کو حسنِ دلربا اُنؐ سے ملا

لمسِ نعلینِ نبیؐ سے جن کو تابانی ملی
کہکشائوں کا حسیں تر سلسلہ اُن سے ملا

کس قدر خوش بخت ہے حسانؓ بن ثابت کی ذات
نعت کہنے ، پڑھنے ، سننے کا صلہ اُنؐ سے ملا

وادیِ طائف میں صبر و استقامت دیکھ کر
عزم و ہمت کا سبق ہم کو جدا اُنؐ سے ملا

اُنؐ کو خالق نے بنایا ، قاسمِؐ انعامِ کُل
جو ملا ، جب بھی ملا ، جتنا ملا ، اُنؐ سے ملا

جب بھی دی عرفانؔ نے دہلیزِ اقدس پر صدا
صدقۂ آلِ نبیؐ اُس کو سدا اُنؐ سے ملا