ﷺ
ہر سانس کو ہوائے معطر ہوئی نصیب
خوشبو کلام آپؐ کا پڑھ کر ہوئی نصیب

کیف و سرور دل میں اُترتا چلا گیا
جس وقت اس کو یادِ پیمبرؐ ہوئی نصیب

چوکھٹ ملی ہے سرورِ کون و مکانؐ کی
قسمت ہمیں تو رشکِ سکندر ہوئی نصیب

اِس دل کے ساتھ روح بھی سرشار ہو گئی
جب سے ولائے وارث کوثرؐ ہوئی نصیب

یہ نسبتِ رسولؐ کا اعجاز خاص ہے
ہم کو جزا ، عمل سے جو بڑھ کر ہوئی نصیب

بے شک ہے اِس میں اُنؐ کا پسینہ مہک فشاں
مہکار تجھ کو جو اے گل تر! ہوئی نصیب

عرفانؔ! قبر میں بھی رہے میرے ساتھ ساتھ
خلوت میں اُنؐ کی یاد جو پل بھر ہوئی نصیب