ﷺ
در حقیقت اُس کو حاصل خُلد میں گھر ہو گیا
روضۂ اقدس کا جو خوش بخت زائر ہو گیا

دشت تیرؐے نقشِ پا کے لمس سے ہے باغ باغ
خار تیرؐے ہاتھ میں آ کر گلِ تر ہو گیا

ہر ادائے مصطفیؐ اسلام کی پہچان ہے
سیرتِ شمس الضحیٰؐ سے دیں منوُر ہو گیا

پڑ گئی جس پر شفاعت آفریں نگہِ کرم
داورِ محشر کا لطفِ خاص اُس پر ہو گیا

اُس طرف ہی عالمِ اسلام کا قبلہ ہوا
جس طرف سرکارؐ کا روئے منوّر ہو گیا

تلخیِ میدانِ محشر سے اماں مل جائے گی
میری قسمت میں اگر اِک جامِ کوثر ہو گیا

ربِ اکبر کی نظر میں سرخرو ہو جاؤں گا
میرا اِک بھی حرفِ مدحت معتبر گر ہو گیا

نورِِ قرآں ، روحِ ایماں ، سرِّ عرفانِؔ خدا
آپؐ کی آمد سے ہم پر سب اُجاگر ہو گیا