ﷺ
تقلیدِ مُصطفیٰؐ میں اگر سر نہیں گیا
سجدہ اجابتوں کے سفر پر نہیں گیا

اُس کو رہِ حیات میں منزل نہ مل سکی
جو راہِ مصطفی سے گزر کر نہیں گیا

جیسے خدائے پاک کا ثانی کہیں نہیں
نبیوںؑ میں کوئی تیرےؐ برابر نہیں گیا

محشر کے روز بجھ نہ سکی اُس کی تشنگی
لے کر جو پیاس جانبِ کوثر نہیں گیا

تنہا گئے ہیں صاحبِ معراجؐ سوئے عرش
جبریلؑ کا جہاں پر شہپر نہیں گیا

مجھ کو عطا وہؐ کرتے گئے آرزوئے شوق
جب تک کہ میرا کاسۂ دل بھر نہیں گیا

عرفانؔ! جس کو مل گئی خیرالوریٰؐ سے خیر
وہ بھیک مانگنے کبھی در در نہیں گیا