ﷺ
خدا کا آخری پیغام لے کر آنے والے آپؐ
جہاں میں رونقِ اسلام لے کر آنے والے آپؐ

جہاں پر نور اور ظلمت میں کچھ تفریق ہی نہ تھی
وہاں تفریقِ صبح و شام لے کر آنے والے آپؐ

منات و لات و عزّی کا تھا صدیوں سے وہاں قبضہ
خدا کے گھر خدا کا نام لے کر آنے والے آپؐ

بہارِ جاوداں دنیا کے ویرانوں سے پھوٹی ہے
جہانِ خار میں گلفام لے کر آنے والے آپؐ

سحابِ رحمتِ کُل ؛ کھل کے برسا دشت و صحرا پر
خدا کی رحمتیں ہر گام لے کر آنے والے آپؐ

کلامِ گُل فشاں سے باغِ اقرا میں بہار آئی
خزانہ لوح کا بے دام لے کر آنے والے آپؐ

سرِ کوثر ، لبِ عرفانؔ بھی سیراب ہو اے کاش
مئے توحید کا بھی جام لے کر آنے والے آپؐ