ﷺ
کرو مدحِ خیرالوریٰؐ خوب صورت
نبیؐ سے ملے گی ردا خوب صورت

حرم کی زمیں سب سے ارفع و اعلیٰ
نبیؐ کے جہاں نقشِ پا خوب صورت

بجز لمحۂ ذکرِ خیرالخلایقؐ
بشر کے لئے اور کیا خوب صورت؟

کرو اُنؐ کی باتیں ، پڑھو اُنؐ کی نعتیں
کہو مل کے صلّ علیٰ خوب صورت

نبیؐ کا سراپا ، نبیؐ کی ادائیں
بہت خوب رُو ، بے بہا خوب صورت

خرد آفریں آفریں کہہ رہی ہے
ترےؐ عشق کا راستا خوب صورت

کہا حق نے جنؐ کو ’’سراجامنیرا‘‘
وہی ذاتِ شمس الضحیٰؐ خوب صورت

نبیؐ کے وسیلے سے جو مانگی عرفاںؔ
یقیناََ وہ ہو گی دعا خوب صورت