ﷺ
خدا کی خاص عنایت حضورؐ کی رحمت
حضورِ پاکؐ ہیں ربِّ غفور کی رحمت

سیاہ رات کی زحمت کا خوف طاری تھا
حضورؐ آئے ؛ ہوئی صبحِ نور کی رحمت

سحابِ رحمتِ خلَّاقِ دو جہاںؐ کی قسم!
برس رہی ہے سبھی پر حضورؐ کی رحمت

درود پاک پڑھا جس نے بھی محمدﷺ پر
خدائے پاک نے اُس پر ضرور کی رحمت

یہی ہے نعمت عظمیٰ جہانِ انعم میں
ہوئی ہے پیکر خاکی پہ نورؐ کی رحمت

نہیں ہے عالمِ دنیا پہ ہی کرم موقوف
شفیعِ حشرؐ ہیں یوم النشور کی رحمت

ہمارے فکر و سخن اور بیان کو یارب!
عطا ہو کیف کی برکت ، سرور کی رحمت

یہ فیضِ صاحبِ لولاکؐ ہی ہے عرفاںؔ پر
ہے اس کے ذہنِ رسا پر شُعور کی رحمت