ﷺ
صدائے صمد ہے صدائے محمدﷺ
ادائے احد ہے ادائے محمدﷺ

دلوں کو دلوں سے ملائے محمدﷺ
عدو کو گلے سے لگائے محمدﷺ

عطا در عطا ہے عطاؤں کا محور
عطائے اِلٰہی ، عطائے محمدﷺ

کہاں دُوسرا سرورِ دو سراؐ سا
کہاں دُوسرا کوئی لائے محمدﷺ

مرے واسطے سلسلۂ ہدیٰ ہے
درِ آلِ احمدؐ ، ولائے محمدﷺ

عمرؓ ہو گئے کس طرح سے مکرّم
اُسے لگ گئی ہے دعائے محمدﷺ

سرِ سرحدِ لامکاں کی رسائی
ہوئی کس کو حاصل سوائے محمدﷺ

وہؐ سدرہ سے آگے کی راہوں کے سائر
کہاں سے کہاں ہو کے آئے محمدﷺ

ہے اِسمِ محمدﷺ دکھوں کا مداوا
ہر اِک روگ دل کا مٹائے محمدﷺ

علی ؔ! آؤ اُس در کی کر لو گدائی
دو عالم ہوا ہے گدائے محمدﷺ