ﷺ
اپنے جہانِ دل میں بسا! آرزوئے دوستؐ
جانے کے ہو ہی جائیں گے سامان سوئے دوستؐ

ہر وقت میرے سامنے ہو قبلۂ نگاہؐ
آٹھوں پہر ہو میری نظر قبلہ روئے دوستؐ

اِک اِک ادائے خُلق پہ قربان لاکھ ہیں
اہلِ نظر کو بھا گئی کچھ ایسی خوئے دوستؐ

دو چار دن کا موسمِ گل وہ کریں گے کیا
جن کی نظر میں آن بسا رنگ و بوئے دوستؐ

لب بستہ ہی کھڑے رہو! دربارِ قدس میں
احوالِ دل کھلا ہے ترا روبروئے دوستؐ

اُمت کو بخش دے گا وہ صدقۂ مصطفیؐ
رکھ لے گا روزِ حشر خدا آبروئے دوستؐ

عرفانِؔ حق کی ساری مہک مصطفیؐ سے ہے
’’غالب! ندیمِ دوست سے آتی ہے بوئے دوست‘‘