ﷺ
پیکرِ نورِ خداؐ ، مہرِ رسالت کا لباس
نورِ قرآں سے بنا آپؐ کی سیرت کا لباس

صبحِ نو خیز پہ والشمس کی طلعت کا لباس
شب کی ظلمت کو ملا ماہِ نبوّتؐ کا لباس

اس کو اپنانے سے تہذیب کو اک حسن ملا
خلعتِ جنّ و بشرؐ ، آپؐ کی سنّت کا لباس

اُنؓ کو اللہ نے اصحابؓ کا رتبہ بخشا
جن کے ایماں کو ملا آپؐ کی قربت کا لباس

سبطِ پیغمبرِ اسلامؐ کے ہی شایاں ہے
مسندِ منبرِ حق اور امامت کا لباس

تاج والوں سے رعونت کا لبادہ چھینا
خرقہ پوشوں کو دیا آپؐ نے عزّت کا لباس

وجہِ تخلیقِ جہاں ، صاحبِ لولاک لماؐ
اُنؐ کی تخلیق سے معدوم پہ خلقت کا لباس

آپؐ کے دم سے ہے اے باعثِ الطافِ عمیمؐ!
دل کے ہر لمحۂ افسردہ پہ راحت کا لباس

صاحبِ خُلقِ حسیں کا ہے یہ اعجاز فقط
وحشئی دہر کو پہنانا ، شرافت کا لباس

پوچھ تاریخ کے اوراق سے کتنا ہے کٹھن
طائفِ وقت کو پہنانا محبت کا لباس

خم ہے کیوں گنبدِ افلاک سوئے روئے حرم
چشمِ آفاق نے پہنا ہے عقیدت کا لباس

اُنؐ کی سنّت سے مزیّن نہیں تو کچھ بھی نہیں
لاکھ عرفانؔ! کوئی پہنے کرامت کا لباس