ﷺ
قندیلِ محبت کے دیئے نعت کے الفاظ
چمکے ہیں دل و جاں میں مرے نعت کے الفاظ

آیاتِ مقدُس میں ملے نعت کے الفاظ
قرآن کے الفاظ بنے نعت کے الفاظ

دل اہلِ قلم کا ہوا سرشار خوشی سے
قرطاس پہ جس وقت لکھے نعت کے الفاظ

گل ہائے عقیدت کی ہے مہکار سرِ بزم
پھولوں کی طرح لب پہ کھلے نعت کے الفاظ

اس مشقِ سخن کی ہے جزا کوثر و تسننیم
میزان پہ خود بول پڑے نعت کے الفاظ

اعمال کے دفتر کی مجھے خوب خبر تھی
بخشش کا وسیلہ ہی بنے نعت کے الفاظ

الفاظ کی پرواز کوئی جامی سے پوچھے
خود جا نہ سکے اُڑ کے گئے نعت کے الفاظ

بوصیریٔ بیمار شفا یاب ہوئے تھے
جب جانِ مسیحاؐ نے سُنے نعت کے الفاظ

اللہ کی رحمت نے کیا صاحبِ دیوان
عرفانؔ کی خواہش تھی کہے نعت کے الفاظ