ﷺ
قربان زمانہ ہے تو دارین تصدّق
ِکونین کے سلطانؐ پہ کونین تصدّق

راہِ شہِ بطحاؐ پہ ہوئی سدرہ بھی نازاں
’’مازاغ‘‘ پہ ہے منزلِ ’’قوسین‘‘ تصدّق

افلاک کی حسرت ہی رہی بوسۂ پا لے
نعلینِ مقدّس رہے مابین تصدّق

اُس جانِ دو عالمؐ پہ فدا جانِ حزیں ہو
اُس راحتِ دلؐ پر دلِ بے چین تصدّق

ہے رحمتِ کونینؐ کو سبطین سے اُلفت
دینِ شہِ کونینؐ پہ سبطین تصدّق

جب وقتِ سحر صحنِ حرم میں ہوئی آمد
تھے منصفِ اسودؐ پہ فریقین تصدّق

تسکینِ نظر روضۂ محبوبِ نظرؐ ہے
اِس منظرِ پُر نُور پہ دو نین تصدّق

خوشیوں کا نگر لمحۂ مولود سے آباد
میلاد کے لمحات پہ عیدین تصدّق

عرفانؔ کے لب پر سرِ کوثر یہی ہو گا
دو بوند پہ ہو ’’مجمعِ بحرین‘‘ تصدّق