ﷺ
اُن کی سوچوں کا سفر شہرِ مدینہ کی طرف
جن کے خوابوں کا نگر شہرِ مدینہ کی طرف

آنے والوں کے دل و جان وہیں رہ جائیں
جانے والوں کی نظر شہرِ مدینہ کی طرف

قبلۂ دنیا و دیںؐ ، شمعِ حرم گاہِ مبیںؐ
رہبرِ جنّ و بشرؐ ، شہرِ مدینہ کی طرف

ایسی تسکین کسی گوشۂ دنیا میں کہاں
خُلد کا کُھلتا ہے در شہرِ مدینہ کی طرف

ذرّے ذرّے میں وہاں طور نظر آتا ہے
قطرہ قطرہ ہے گُہر شہرِ مدینہ کی طرف

سوز جامیؔ کی جھلک لفظوں میں آئے تو کہوں
’’سطرِ مدحت کا سفر شہرِ مدینہ کی طرف‘‘

کام آتا ہے فقط جذبۂ صادق عرفانؔ
لے کے جاتا نہیں زر ؛ شہرِ مدینہ کی طرف