ﷺ
اُس در سے رُوپ مانگتے ہیں صبح و شام ؛ رنگ
جس کے طفیل رنگِ چمن کے تمام رنگ

فطرت کا حسنِ کُل ہے دھنک بن کے سرنگوں
جھکتے ہیں اُنؐ کے در پہ بصد اہتمام رنگ

وہ خاص ہے جو آپؐ سے منسوب ہو گیا
ورنہ تمام رنگ ہیں دنیا کے عام رنگ

حکمِ اذاں تھا بامِ حرم پر بلالؓ کو
دیکھا نہیں نبیؐ نے نسب ، قوم ، نام ، رنگ

دیکھو ذرا دھنک کے سبھی رنگ غور سے
کرتے ہیں سبز رنگ کا بھی احترام رنگ

عرفاںؔ! ادائے صاحبِ شق القمر سے قبل
ماہِ تمام رکھتا تھا اپنے تمام رنگ