ﷺ
ہادیِ جنّ و بشرؐ کی صورت و سیرت کمال
شاہراہِ زندگی میں آپؐ کی سنّت کمال

آسماں پر اوج اُس کا تو برائے نام ہے
صاحبِ شقّ القمرؐ کی عظمت و رفعت کمال

آپؐ ہی اسریٰ کی شب ٹھہرے امامِ انبیاء
کثرتِ خاصاں میں بھی ہے خاصۂ وحدت کمال

عرش پر بلوا کے خود اللہ نے دل جوئی کی
آپؐ کے دلدار کی ہے آپؐ سے اُلفت کمال

باعثِ تسکینِ قلب و روح و جسم و جان ہے
تذکرۂ رحمتِ کونینؐ میں راحت کمال

دولتِ دیدارِ محبوبِ خداؐ معراجِ دید
حلقۂ اصحاب کو حاصل ہے یہ دولت کمال

رہبرِؐ کامل نے آ کر دین اکمل کر دیا
دولتِ عرفانِ رب کی مل گئی نعمت کمال