ﷺ
شہرِ نبیؐ میں مکّہ سے ہو کر چلیں گے ہم
دامانِ داغدار کو دھو کر چلیں گے ہم

تر دامنی کو اشکِ ندامت سے دھوئیں گے
عشقِ نبیؐ میں خود کو ڈبو کر چلیں گے ہم

روئیں گے خوب شہرِ مدینہ کی یاد میں
اشکوں کے خوب ہار پرو کر چلیں گے ہم

روح و دل و دماغ میں طیبہ کی ہو فضا
یوں صحنِ جاں میں شوق کو بو کر چلیں گے ہم

’’ماذاغ‘‘ کی ادا کا تکلّم کلیمؑ سے
تم کام کر نہ پائے تھے جو ؛ کر چلیں گے ہم

آغوش میں یوں نیند نے لے کر مجھے کہا
آؤ درِ رسولؐ پہ سو کر چلیں گے ہم

عرفانؔ ! اب تو عزم یہی چشمِ تر کا ہے
داغِ غمِ فراق کو دھو کر چلیں گے ہم