ﷺ
قصیدہ سب سے بہتر ہے کہ اشکوں کو زباں کر لوں
یہ کلمہ سب سے بہتر ہے کہ اشکوں کو زباں کر لوں

کہاں تسبیح کا دانہ ؛ کہاں قسمت ہے آنسو کی
وظیفہ سب سے بہتر ہے کہ اشکوں کو زباں کر لوں

ادب گاہِ نبوّت میں زباں بندی کا عالم ہے
تقاضا سب سے بہتر ہے کہ اشکوں کو زباں کر لوں

نہیں منت کشِ تابِ صبا احوالِ دل اپنا
ذریعہ سب سے بہتر ہے کہ اشکوں کو زباں کر لوں

جہانِ کیفیت میں چشمِ تر کا مرتبہ اعلیٰ
قرینہ سب سے بہتر ہے کہ اشکوں کو زباں کر لوں

کبھی جب طعنہ زن ہوں نامۂ اعمال پر عصیاں
مداوا سب سے بہتر ہے کہ اشکوں کو زباں کر لوں

اگر وہؐ پوچھ لیں عرفانؔ! مجھ سے حالِ دل میرا
’’طریقہ سب سے بہتر ہے کہ اشکوں کو زباں کر لوں‘‘