ﷺ
خدا اور ملائک کا میں ہم نوا ہوں
’’شب و روز مشغولِ صلِّ علیٰ ہوں‘‘

مری خاک پر ، پَر فرشتے بچھائیں
مدینے کو جاتا ہوا راستہ ہوں

درِ شہؐ پہ آ کر کہے شب کی ظلمت
طلب گارِ انوارِ شمس الضحیٰ ہوں

خیاباں خیاباں نویدِ بہاراں
دیارِ نبیؐ کی معطر ہوا ہوں

مجھے خیر کی بھیک ملتی رہے گی
گدائے درِ آلِ خیرالوریٰ ہوں

کہا آبِ کوثر نے ہونٹوں کو چھُو کر
جزائے ثنائے شہِ دوسَرا ہوں

مجھے اپنی قسمت پہ ہے ناز عرفانؔ
گدائے شہنشاہِ روزِ جزا ہوں