ﷺ
دُور اُن سے دہر کی ساری بلائیں ہو گئیں
جن کی قسمت میں مدینے کی فضائیں ہو گئیں

ہم کو پہلے مل گئے رب کی عطا سے مصطفی ؐ
مصطفی ؐ کی ہم پہ پھر ساری عطائیں ہو گئیں

آمدِ محبوبِؐ ربِّ العالمیں کے فیض سے
فیض یابِ نعمتِ رب ساری مائیں ہو گئیں

عرش پر بھی بہرِ امت در گزر کی اِلتجا
فرش پر بھی ’’ربِّ ھب لی‘‘ کی دُعائیں ہو گئیں

سبطِ پیغمبر پہ جاں کچھ اس طرح قربان کی
حضرتِ عباسؓ پر قرباں وفائیں ہو گئیں

فاتحِ مکہ کا وہ اظہارِ امن و آشتی
محوِ حیرت امن کی سب فاختائیں ہو گئیں

آپؐ کا سجدئہ محشر کام آیا اُس گھڑی
پیشِ داور عاصیوں کی جب خطائیں ہو گیئں

گنگ لہجوں کی صدا آقاؐ عطا ہوں مدحتیں
مسکرا کے آپؐ نے فرمایا! ’’جائیں ہو گئیں‘‘

مَزرعِ ہستی پہ بارِش ہو گئی انوار کی
ظلمتیں مٹتی گئیں عرفاںؔ! ضیائیں ہو گئیں