ﷺ
وہ جس میں اُسوۂ کامل حلول ہوتا نہیں
’’قسم خدا کی محب رسولؐ ہوتا نہیں‘‘

حضورِ رب ازل ؛ مدعاے آدمؑ بھی
بغیر اسمِ محمدﷺ قبول ہوتا نہیں

بھٹکتا رہتا ہے وہ آندھیوں ، بگولوں میں
جو ذرّہ خاکِ مدینہ کی دُھول ہوتا نہیں

نبیؐ کے ذکرِ معطر میں جو بھی محو رہے
خزاں کے ہاتھوں وہ پامال پھول ہوتا نہیں

نبیؐ بھی ہم سے بشر ہیں تو پھر بتاؤ ہمیں
وحی کا ہم پہ بھلا کیوں نزول ہوتا نہیں

نظر میں جس کی رہے رحمتِ حبیبِ خداؐ
رہِ حیات میں ہرگز ملول ہوتا نہیں

خدا سے مانگو اگر صدقۂ رسولؐ خدا
قبولِ عرض میں عرفانؔ! طول ہوتا نہیں