ﷺ
خدا کی مغفرت ہے عام ، طیبہ کی فضائوں میں
گنہگاروں کا نیک انجام ، طیبہ کی فضائوں میں

یہاں پر رحمتیں ہیں ، برکتیں ، رب کی عطائیں ہیں
سنور جاتے ہیں بگڑے کام ، طیبہ کی فضائوں میں

مقامِ گُل کا ہو ادراک کیا گلزارِ طیبہ میں
لگا ہے خار کا بھی دام ، طیبہ کی فضائوں میں

میں اپنی زندگی کی صبحِ نو قربان کر ڈالوں
اگر ہو جائے میری شام ، طیبہ کی فضائوں میں

در و دیوارِ مکّہ سے درودوں کی صدا آئے
خدا کا گونجتا ہے نام ، طیبہ کی فضائوں میں

غم و آلامِ دنیا ہے نہ عُقبیٰ کی پریشانی
دلِ عرفانؔ کو آرام ، طیبہ کی فضائوں میں