اسمِ اعظم کے وہ اسرار کو پا لیتے ہیں
’’عشقِ سرکاؐر جو سینے میں بسا لیتے ہیں‘‘

نعمتِ عُظمیٰ کا فیضان انہیں ملتا ہے
جو درِ قدس پہ دامن کو بچھا لیتے ہیں

اُن کو آتے ہیں نظر نورِ ہدیٰ کے جلوے
خاک طیبہ کی جو آنکھوں میں لگا لیتے ہیں

ہر صحابیؓ کا یہ مسلک ہے کہ رودادِ الم
جنؐ کی سُنتا ہے خدا اُنؐ کو سُنا لیتے ہیں

روزنِ چشمِ تصوّر سے اُنہیںؐ دیکھتے ہیں
دوریوں میں یوں حضوری کا مزا لیتے ہیں

شوقِ طیبہ کا شجر سوکھنے کب دیتے ہیں
اشکِ ہجراں کا اِسے پانی لگا لیتے ہیں

اُن کی سانسوں میں بسی خلدِ بریں کی خوشبو
شہرِ طیبہ کی جو عرفانؔ ہوا لیتے ہیں