ﷺ
رحمۃ اللعالمیںؐ سا دوسرا ہے ہی نہیں
آپؐ کے لطف و کرم کی انتہا ہے ہی نہیں

آپؐ کے نورِ مقدس سے ہے روشن کائنات
اس سے بڑھ کر روشنی کا سلسلہ ہے ہی نہیں

بلبلاتے اونٹ کی صورت پکارے یا نبیؐ
جس کا دنیا میں کوئی غم آشنا ہے ہی نہیں

گیسوئے سرکارؐ کی خوشبو بسا لو سانس میں
کون کہتا ہے کرونا کی دوا ہے ہی نہیں

کر گئی فاروقِؓ اعظم کی عدالت فیصلہ
مصطفی کے فیصلے پر فیصلہ ہے ہی نہیں

بانٹتا ہے دو جہاں کی نعمتیں خیرات میں
جو فقیرِ مصطفیؐ ہے وہ گدا ہے ہی نہیں

اس سعادت میں نہاں عرفانؔ کا معراجِ فن
نعت میں جو ہے غزل میں وہ مزا ہے ہی نہیں