ﷺ
پُر کیف ہوائیں ہیں ہر سمت مدینے میں
ہر سانس معطر ہے کیا لطف ہے جینے میں

مہکار بہاروں کے خوش رنگ نظاروں میں
کیا منبعِ خوشبو ہے آقاؐ کے پسینے میں

ہے رختِ سفر تقویٰ اور صلِّ علیٰ لب پر
خوش بخت ہیں زائر سب طیبہ کے سفینے میں

دنیا میں شفا ٹھہری زمزم اور عجوہ میں
محشر میں بھی راحت ہے کوثر کے ہی پینے میں

گھر گھر میں چراغاں ہے میلاد کی محفل سے
محبوبؐ کی آمد ہے اِس پاک مہینے میں

قسمت کے سکندر ہیں رہتے ہیں جو طیبہ میں
’’ طیبہ کی فضاؤں میں کیا لطف ہے جینے میں‘‘

یا شاہِؐ امم دینا عرفانؔ کو اک قطرہ
ہیں بحر ہزاروں ہی رحمت کے خزینے میں