ﷺ
دریدہ جھولیاں بھر کر ، فقیر آئے ہیں
یہ کس کریمؐ کے در پر ، فقیر آئے ہیں

حضورؐ! اپنا مقدر سنوارنے کے لیے
کہاں کہاں سے کہاں پر فقیر آئے ہیں

خدا نے آپؐ کے در پر کہا ہے آنے کا
خدا کا واسطہ لے کر ، فقیر آئے ہیں

درِ حضورؐ پہ بھرتی ہیں جھولیاں سب کی
ترےؐ فقیروں سے سن کر ، فقیر آئے ہیں

خدارا چشمِ کرم ہم پہ ساقیِؐ کوثر!
بہ تشنہ لب سرِ کوثر ، فقیر آئے ہیں

بنے ہوئے ہیں سکندر ، جو وقت کے عرفانؔ
وہ بادشاہ بھی بن کر فقیر آئے ہیں