بدر الدجیؐ کی بات ہے اور ہم ہیں دوستو!
ذکرِ نبیؐ کی رات ہے اور ہم ہیں دوستو!

ہر حرفِ احتیاط ہے اور ہم ہیں دوستو!
نوکِ قلم پہ نعت ہے اور ہم ہیں دوستو!

اُس بارگاہِ ناز میں مدحت کے پھول ہیں
مداح رب کی ذات ہے اور ہم ہیں دوستو!

اِس بزمِ خاص میں ہے فقط اُنؐ کا تذکرہ
میرے نبیؐ کی بات ہے اور ہم ہیں دوستو!

لمحے ہماری عُمر کے کتنے قلیل ہیں
کتنی طویل بات ہے اور ہم ہیں دوستو!

یہ فخر ہے کہ اُمّتی خیرالورؐیٰ کے ہیں
مقصودِ کائناتؐ ہے اور ہم ہیں دوستو!

ہر حرفِ نعت ہم پہ عطا ہے حضورؐ کی
یہ قلبی واردات ہے اور ہم ہیں دوستو!

ہم کو تو کائنات ہی لگتی ہے بزمِ نعت
عرفانؔ! وہ بھی ساتھ ہے اور ہم ہیں دوستو!