ﷺ
صفاتِ حسنِ مطلق سے بشر کی آشنائی ہو
’’پسِ فکر و تعمّل جب جمالِ مُصطفائی ہو‘‘

یہی پُر نور منظر مظہرِ حسنِ حقیقت ہے
رُخِ تاباں کی رعنائی سے حق کی رونمائی ہو

اگر شامل درودوں کی صدائیں اِس میں ہو جائیں
بھلا حرفِ دعا کو کیوں ملالِ نارسائی ہو

گدایانِ درِ آلِ نبیؐ کیسے نہ نازاں ہوں
فزوں تر تختِ شاہی سے جب اِس در کی گدائی ہو

یہ وہ کوچہ ہے جس کوچے پہ جنّت ناز کرتی ہے
یہی وہ در ہے جس در پر دو عالم کی بھلائی ہو

سرِ شاخِ تمنّا غنچہ ہائے شوق رقصاں ہوں
صبا گلزارِ طیبہ سے کوئی پیغام لائی ہو

عطائے حرفِ مدحت ہو پسِ خاموشیِ خلوت
سرِ بزمِ سخن ہم کو عطا پھر لب کشائی ہو

وہاں عرفانؔ سا عاجز جھکائے کیوں نہ سر اپنا
جہاں پر سرنگوں سارے جہاں کی پارسائی ہو