ﷺ
نگاہِ شوق کا قبلہ مدینہ
الٰہی! ہم کو بھی دکھلا مدینہ

مری چشمِ تصوّر رو پڑی ہے
مری پلکوں پہ آ ٹھہرا مدینہ

سعادت سے ہیں یہ محروم اب تک
نِگاہوں نے نہیں دیکھا مدینہ

کہاں میں عبدِ عاصی اور وہ نگری
’’کہاں میں ہوں کہاں پیارا مدینہ؟‘‘

خدایا! آرزو بَر آئے میری
میں دیکھوں پیارے آقاؐ کا مدینہ

مری راہوں میں قدسی پَر بچھائیں
مری منزل بنے ، مکّہ ، مدینہ

مقامِ حسرت و توفیق یکجا
نجانے کیسے دیکھوں گا مدینہ