ﷺ
شانِ نورِ صاحبِ لولاکؐ یوں سمجھی گئی
خِلقتِ کُن کی بِنا اِس نُور پر رکھی گئی

یاد جب بھی آ گئے وہ صاحبِ خلقِ عظیمؐ
ہر کسی پر پیار آیا ؛ دل سے ہر تلخی گئی

بُت پرستی پر لگائی ضرب حق کچھ اس طرح
پھر نہ آئی لوٹ کر ؛ ایسی مٹی ، ایسی گئی

آپؐ کے در پر سخاوت کو عُروج اِتنا ملا
مانگ لی خیرات جس نے بھی اُسے ملتی گئی

خلوتِ غم میں جسے غمخوار کی یاد آ گئی
آپؐ کی موجودگی میں اُس کی تنہائی گئی

مسجدِ اقصیٰ میں عرفاںؔ! ہر نبیؑ کی ذاتِ پاک
تاجدارِ انبیاؐ کی اِقتدا کرتی گئی