ﷺ
سیرِِ افلاک کو جائیں گے خلا ڈھونڈیں گے
اپنی پرواز سے کچھ لوگ خدا ڈھونڈیں گے

کچھ نہیں پائیں گے یہ شہرِ صبا کے باسی
رب کو سورج کی شعائوں میں بڑا ڈھونڈیں گے

پتھروں کو کبھی پوجیں گے تو آتش کو کبھی
بے وفائوں سے وفائوں کا صلہ ڈھونڈیں گے

روشنی پھیل چکی نورِ حرا کی ؛ پھر بھی
آتشِ وادیِ سینا میں ضیاء ڈھونڈیں گے

گردشِ وقت سے اوراق ہیں بکھرے بکھرے
ایسے تحریف شدہ نسخوں میں کیا ڈھونڈیں گے

شہرِ خاموش میں جا کر یہ صدائیں دیں گے
ماہیِ آب کو صحرائوں میں جا ڈھونڈیں گے

نکہتِ بادِ بہاری سے چھڑا کر دامن
بادِ صر صر میں یہ خوشبو کی فضا ڈھونڈیں گے

قافلہ راہ میں اخلاص کا لُٹ جائے گا
راہزن لوٹ ہی لیں گے جو بھلا ڈھونڈیں گے

راہبر راہ میں رہ جائیں گے ہر راہی کے
راہ جب آپؐ کی راہوں سے جدا ڈھونڈیں گے

نورِ عرفانؔ خدا اُن کا مقدّر ہے جو لوگ
’’آپؐ کی سیرتِ اطہر سے ضیاء ڈھونڈیں گے‘‘