ﷺ
ظلمتِ روئے فلک مطلعِ انوار ہوئی
چھا گیا نورِ مبیںؐ آمدِ سرکار ہوئی

صدقۂ نورِ نبیؐ حضرتِ عبداللہؓ تک
نخلِ عدنان کی ہر شاخ ثمر بار ہوئی

تابِ خورشید نے کرنوں کا لبادہ اوڑھا
رُوئے مہتاب پہ رعنائی نمودار ہوئی

اُنؐ کے کردار نے جینے کے قرینے بخشے
’’اُنؐ کی آمد سے حیات اپنی ضیا بار ہوئی‘‘

اُس طرف چشمِ عنائت سے خدا نے دیکھا
ذاتِ محبوبِ خداؐ جس کی طرفدار ہوئی

جانِ عالمؐ کا سفر عالمِ بالا کی طرف
طائرِ وقت کی پرواز گرفتار ہوئی

ربِّ ھب لی کی دعاؤں کی بدولت عرفاں
کشتیٔ بارِ گنہ پل سے مری پار ہوئی